Nú er að hefjast bygging gasskiljustöðvar við Hellisheiðarvirkjun með það hlutverk að hreinsa brennisteinsvetni úr útblæstri virkjunarinnar. Smíðinni á að ljúka í mars 2014 en hún er mikilvægur þáttur í SulFix-verkefni Orkuveitu Reykjavíkur, Landsvirkjunar og HS Orku. Markmið þess verkefnis er að þróa og byggja hagkvæmar lausnir svo starfsemi jarðgufuvirkjana fyrirtækjanna uppfylli ákvæði reglugerðar um brennisteinsvetni í andrúmslofti, sem sett var árið 2010. Sjá nánar á vef OR.
Ummæli iðnaðarráðherra um Norðlingaölduveitu hafa kallað fram nokkrar umræður. Meðal annars hefur komið fram að um sé að ræða orkukost sem raðað hafi verið í verndarflokk skv. tillögum sérfræðinga rammaáætlunar. Það er ekki rétt og ástæða til að benda á fáein atriði í þessu sambandi:
1. Norðlingaölduveita 566-567,5 m.y.s. er einn þeirra orkukosta sem Alþingi hefur raðað í verndarflokk.
2. Sérfræðingar rammaáætlunar − verkefnisstjórnin − röðuðu þessum orkukosti hins vegar fyrir ofan miðju frá sjónarhorni nýtingar, eða nr. 30 af 69 kostum. Fyrrgreind niðurstaða Alþingis varðandi þennan orkukost var því ekki á grundvelli vinnu sérfræðinga rammaáætlunar, ekki fremur en gildir raunar um marga aðra kosti. Ætla mætti að honum hefði verið raðað í nýtingarflokk, e.t.v. í biðflokk, ef Alþingi hefði fylgt niðurstöðum verkefnisstjórnar.
3. Komi fram tillaga um aðra útfærslu á umræddri veituframkvæmd mun sú tillaga fara sína leið í ferli rammaáætlunar, á vegum nýrrar verkefnisstjórnar sem skipuð var í apríl sl.
4. Slík tillaga hefur þó ekki komið fram.
Mikill fjöldi gesta heimsækir íslenskar virkjanir og upplýsingamiðstöðvar orku- og veitufyrirtækja á ári hverju, alls nokkuð á annað hundrað þúsund manns. Virkjanir og orkumannvirki eru aðgengileg gestum víða um land og víða hafa verið settar upp sýningar og boðið upp á sérstaka leiðsögn fyrir ferðamenn. Erlendir gestir eru margir áhugasamir um nýtingu vatnsafls og ekki síður jarðhita (sem færri þekkja), en fjöldi Íslendinga sækir einnig heim orkumannvirkin og sýningar orkufyrirtækjanna. Ennfremur taka þessi fyrirtæki á móti fjölda gesta í sínum höfuðstöðvum. Þá sækja fleiri hundruð þúsund gesta heim ferðamannastaði sem tengjast virkjunum og orkunýtingu með beinum hætti, svo sem Bláa lónið, Perluna og Jarðböðin við Mývatn.
Um 50 þúsund gestir í Hellisheiðarvirkjun
Flestir gestir heimsækja Hellisheiðarvirkjun, um fimmtíu þúsund á ári, en fyrirtækið Orkusýn rekur þar jarðhitasýningu sem opin er alla daga. Sjá nánar á vef Orkusýnar.
Kárahnjúkar, vindmyllur, gagnvirk orkusýning…
Gestastofur Landsvirkjunar eru opnar á sumrin, en tekið er á móti hópum eftir samkomulagi yfir vetrartímann. Skoða má gagnvirka orkusýningu í Búrfellsstöð og einnig er boðið upp á reglulegar skoðunarferðir um Kárahnjúkasvæðið, kynningu á vindmyllum o.fl. Fjölsóttasta stöð Landsvirkjunar er Kröflustöð þar sem tekið er á móti um tíu þúsund gestum á ári. Sjá nánar á vef Landsvirkjunar.
Sýningin Orkuverið Jörð
HS Orka tekur á móti hópum í virkjunum sínum samkvæmt samkomulagi en í Reykjanesvirkjun starfrækir fyrirtækið sýninguna Orkuverið Jörð, sem opin er um helgar yfir sumarmánuðina, eða eftir samkomulagi. Sjá nánar á vef HS Orku.
Fleiri virkjanir má nefna, t.d. hina 100 ára gömlu Fjarðarselsvirkjun þar sem RARIK starfrækir minjasafn og tekið er á móti hópum. Loks taka Orkubú Vestfjarða, Orkusalan, Fallorka, Norðurorka o.fl. gjarnan á móti hópum og ferðafólki samkvæmt samkomulagi hverju sinni, ýmist í sínum höfuðstöðvum eða virkjunum.
Samorka hefur ráðið Sigurjón Norberg Kjærnested vélaverkfræðing í starf framkvæmdastjóra veitusviðs samtakanna. Sigurjón er með M.Sc. gráðu í vélaverkfræði frá Háskóla Íslands. Sigurjón hefur m.a. starfað sem aðstoðarkennari við Háskóla Íslands og frá árinu 2011 hefur hann starfað hjá verkfræðistofunni Mannvit.
Sigurjón er formaður vélaverkfræðideildar Verkfræðingafélags Íslands, 1. varaþingmaður Framsóknarflokksins í Suðvesturkjördæmi og fyrrverandi formaður Sambands ungra framsóknarmanna. Hann hefur störf hjá Samorku í byrjun september.
Ráðgjafarhópur iðnaðar- og viðskiptaráðherra um lagningu sæstrengs til Evrópu hefur skilað tillögum sínum til ráðherra. Ráðgjafarhópurinn var samhljóða í sinni ályktun að frekari upplýsingar þurfi til að unnt sé að fullyrða um þjóðhagslega hagkvæmni þess að leggja sæstreng milli Íslands og Bretlands, en áætlað er að nettó útflutningstekjur af flutningi raforku um sæstreng geti orðið allt að 76 milljarðar króna á ári. Lagt er til að haldið verði áfram að kortleggja alla þætti verkefnisins hér innanlands um leið og leitað verði svara um möguleg rekstrar- og eignarhaldsmódel hjá viðsemjendum í Bretlandi. Sjá skýrsluna á vef atvinnuvegaráðuneytis.
Samtök atvinnulífsins hvöttu á dögunum fyrirtæki til að taka þátt í að efla verk- og tæknimenntun með því að kynna atvinnulífið fyrir nemendum og kennurum grunn- og framhaldsskóla. Skemmst er frá því að segja að viðbrögðin voru mjög jákvæð og brugðust fyrirtækin skjótt við kallinu. Um 50 fyrirtæki − m.a. nokkur orku- og veitufyrirtæki − hafa nú þegar lýst yfir áhuga á efla starfsmenntun með því að taka þátt en fleiri geta bæst í hópinn. Sjá nánar á vef SA.
Samorka auglýsir laust til umsóknar starf framkvæmdastjóra hita-, vatns- og fráveitusviðs á skrifstofu samtakanna.
Helstu verkefni:
• Umsjón með starfi fagráða umræddra veitusviða o.fl. hópa á vegum samtakanna
• Umsjón með vinnslu handbóka og tæknilegra tengiskilmála
• Skipulagning og umsjón með framkvæmd námskeiða og funda
• Þátttaka í mótun stefnu um starfsumhverfi veitnanna og í samskiptum við ráðuneyti og opinberar stofnanir
Menntunar- og hæfniskröfur:
• Tæknimenntun á sviði bygginga eða véla og/eða önnur menntun sem nýtist í starfi
• Góð almenn tölvufærni
• Góð íslensku- og enskukunnátta, Norðurlandamál einnig kostur
• Frumkvæði, metnaður og sjálfstæði í vinnubrögðum
• Færni og lipurð í mannlegum samskiptum
• Starfsreynsla hjá veitufyrirtæki er mikill kostur
Umsóknir skulu sendar til framkvæmdastjóra, Gústafs Adolfs Skúlasonar (gustaf (hjá) samorka.is), sem einnig veitir upplýsingar um starfið.
Umsóknarfrestur er til 14. júní nk., en gert er ráð fyrir að nýr starfsmaður hefji störf mánudaginn 2. september.
Fagfundi Samorku 2013 á Kirkjubæjarklaustri er lokið.
Hér má skoða glærusýningar frá fyrirlestrunum: Smellið hér
Dagskrá fundarins: Smellið hér
Morgunblaðsgrein Gústafs Adolfs Skúlasonar:
Davíð Þorláksson, formaður Sambands ungra sjálfstæðismanna, skrifar grein í Morgunblaðið 7. maí þar sem hann hvetur hægrimenn til að hætta svokallaðri stóriðjustefnu. Hér er ekki ætlunin að svara fyrir hönd annarra hægrimanna. Hins vegar er rétt að benda á ákveðin atriði varðandi raforkuverð og svokallaða stóriðjustefnu.
Ábyrgðargjald til eigenda
Davíð segir hið opinbera sjá stóriðjunni fyrir ódýrri orku sem hann rekur til opinberra ábyrgða á lánsfjármögnun orkufyrirtækja. Þær skili lágum fjármagnskostnaði sem aftur skili sér svo í lægra orkuverði til stóriðjunnar. Nú er það hins vegar svo að samkvæmt lögum nr. 144/2010 og lögum nr. 21/2011 greiða Orkuveita Reykjavíkur og Landsvirkjun ábyrgðargjald af þeim lánaskuldbindingum sem ábyrgð eigenda er á, gjald sem svarar að fullu til þeirrar ívilnunar sem fyrirtækin eru talin (af óháðum aðilum) njóta á grunni ábyrgða eigenda. Þriðja fyrirtækið sem selur raforku til stóriðju, HS Orka hf., er í eigu einkaaðila og nýtur engra opinberra ábyrgða á sínum lánasamningum. Ekki þarf því að óttast að orkufyrirtæki séu að bjóða lágt orkuverð á þessum grundvelli.
Tækifæri með sæstreng
Hins vegar er það rétt að stóriðjufyrirtæki hafa (líkt og allir aðrir) getað nálgast samkeppnishæf verð fyrir raforku hér á landi, enda landið lítill og einangraður raforkumarkaður. Sú staða gæti reyndar breyst með lagningu sæstrengs til Evrópu sem nú er til ítarlegrar skoðunar. Með tilkomu slíkrar tengingar væri hægt að afla mun hærri orkuverða en núverandi markaðsaðstæður bjóða upp á. Þannig vekur athygli að Norðmenn telja sín tækifæri af sölu endurnýjanlegrar orku jafn verðmæt og af sölu á olíu. Hérlendis er orkugetan í endurnýjanlegri orku þreföld á hvern íbúa miðað við Noreg og því ljóst að Íslendingar búa að gríðarlegum tækifærum á þessu sviði.
Íslensk orkufyrirtæki halda ekki uppi því sem oft er nefnt stóriðjustefna. Það er ekkert markmið orkufyrirtækja að hér sé ráðist í tilteknar tegundir fjárfestinga í atvinnulífinu. Framleiðendur raforku vilja einfaldlega hámarka arðsemi og verðmætasköpun af sölu endurnýjanlegrar orku, að sjálfsögðu að uppfylltum öllum skilyrðum um umhverfiskröfur og leyfisveitingar. Fjölmargir aðrir hafa hins vegar kallað eftir aukinni fjárfestingu í íslensku atvinnulífi, en hún mun vera í lágmarki þessi árin. Samningar um kaup á miklu magni af raforku eru oft nauðsynleg forsenda slíkra fjárfestinga, en hagsmunir orkuframleiðenda snúast í þessu samhengi einfaldlega um arðsemi umræddra orkusölusamninga.
Hér á vef Samorku er að finna dagskrá fagfundar raforkusviðs sem haldinn verður á Kirkjubæjarklaustri dagana 23.-24. maí nk., auk upplýsinga um skráningu o.fl. Alls verða á þriðja tug erinda flutt um ýmis atriði er varða rekstur og rekstrarumhverfi raforkufyrirtækja.
